index introductio imagines || partitura exemplar translatio

bibliographia e-mail

CTH 394

Exemplar --

Citatio: A. Chrzanowska (ed.), hethiter.net/: CTH 394 (Expl. --, 13.07.2016)

§1

1 -- UMMA mAšḫella LÚ URUḪapalla

2 -- mān=kan KUR-e anda našma ŠÀ KARAŠ ÚŠ-kan kišari

3 -- nu kī SÍSKUR iyami

§2

4 -- nu kī daḫḫi

5 -- maḫḫan UD.KAM-az nekuz meḫūni kišari

6 -- nu kuiēš kuiēš ENMEŠKARAŠ ḫūmanteš

7 -- nu=za ḫūmanza UDU.ŠIR ḫandaizzi

8 -- UDU.ŠIRḪI.A=ma mān ḫargaēš mān tankuēš

9 -- UL kuitki tuqqari

10 -- nu šūēl SÍG.BABBAR SÍG.SA5 SÍG.SIG7.SIG7 anda tarnaḫḫi

11 -- n=at 1-an anda darupaizzi

12 -- nu=kan 1-EN NA4NUNUZ 1 KAMKAMMATU AN.BAR ŠA A.GAR5=ia anda neḫḫi

13 -- n=at=kan ANA UDU.ŠIRḪI.A UZUGÚ=ŠUNU SIḪI.A=ŠUNU=ia anda ḫamangami

14 -- n=aš GE6-az ANA PĀNI GIŠZA.LAM.GARḪI.A ḫamanganzi

15 -- nu=kan anda kiššan memanzi

16 -- kuiš=wa=kan DINGIR-LUM kattan weḫattari

17 -- kuiš=wa DINGIR-LUM kī ÚŠ-kan iyat

18 -- nu=wa=ta kāša kūš UDU.ŠIRḪI.A kattan išḫiyanun

19 -- nu=wa=kan katta waršiyaḫḫut

§3

20 -- lukkatti=ma=aš LÍL-ri pennaḫḫi

21 -- nu kuedaniya ANA UDU.ŠIR kattan 1 DUGKUKUBI 1 NINDA.GUR4.RA 1 GAL.GIR4 piddanzi

22 -- ANA GIŠZA.LAM.GAR LUGAL=ma peran MUNUS-TUM unuwandan ašaši

23 -- 1 DUGḫūppar KAŠ 3 NINDA.GUR4.RA ANA MUNUS-TI kattan dāi

§4

24 -- namma=kan ANA UDU.ŠIRḪI.A ENMEŠ KARAŠ QĀTĪ=ŠUNU parā tiyanzi

25 -- nu=kan anda kiššan memanzi

26 -- kuiš=wa DINGIR-LIM kī ÚŠ-kan iyat

27 -- kinuna=wa kāša UDU.ŠIRḪI.A arantari

28 -- nu=war=at IŠTU UZUNÍG.GIG UZUŠÀ U IŠTU UZUÚR mekki warganteš

29 -- nu=wa=šši=kan ŠA AMĪLŪTI UZU pug(ga)taru namma

30 -- nu=wa=ššan katta(n) kēdaš UDU.ŠIRḪI.A waršiyaḫḫut

31 -- nu ENMEŠ KARAŠ ANA UDU.ŠIRḪI.A EGIR-an katta ḫinkanzi

32 -- LUGAL=ya ANA MUNUS-TI unuwanti EGIR-an ḫinganzi

§5

33 -- namma=kan UDU.ŠIRḪI.A MUNUS-an NINDA.GUR4.RA KAŠ=ya ANA KARAŠ ištarna arḫa pēdanzi

34 -- n=aš LÍL-ri pennianzi

35 -- n=aš=kan pānzi ANA ZAG LÚKÚR anda arḫa pittalanzi

36 -- kuedani pidi anzel UL aranzi

37 -- nu=kan anda QĀTAMMA=pat memiškanzi

38 -- kāša=wa=ššan kuit kēl ŠA KARAŠ idālu ANA AMĪLŪTI GU4ḪI.A UDUḪI.A ANŠE.KUR.RAMEŠ ANŠE.GÌR.NUN.NA U ANA ANŠEḪI.A anda ēšta

39 -- kinuna=war=at=kan kāša IŠTU KARAŠ kūš UDU.ŠIRḪI.A MUNUS-TUM=ia arḫa uter

40 -- nu=war=at=za kuiš wemiyazzi

41 -- nu=wa=za kī idālu ÚŠ-an apāš KUR-eanza dāu

§6

42 -- INA UD.2.KAM mān lukkatta karūwariuar ḫūdak 6 UDU.ŠIRḪI.A 6 MÁŠ.GAL 12 DUGGÌR.GÁN 12 GALḪI.A 12 NINDA.GUR4.RA 1 DUGḫūppar KAŠ 3 GÍR.TUR ZABAR ḫandanzi

43 -- n=aš LÍL-ri namma tamēdani AŠRI pennianzi

44 -- kī=ia ḫūman kattan pedanzi

45 -- n=aš maḫḫan gimri arnuwanzi

46 -- n=aš tagān ḫattanzi

47 -- n=aš pittalwanteš zanuwanzi

48 -- nu GIŠlaḫḫurnuzi kattan išparānzi

49 -- nu=ššan UZUÌ NINDA.GUR4.RAḪI.A URUDUGÍR.TUR-li=ya kattan ḫandanzi

50 -- namma IŠTU KAŠ GALḪI.A DUGGÌR.GÁN šunnianzi

51 -- namma=kan anda kiššan memaḫ[ḫanzi]

52 -- kāš[a=wa(= … )] ḫūdak ḫantezzi palši … [ … ]

53 -- [ … ] tarnummen

54 -- kinuna=wa kāša t[uk(?) ANA DINGIR]-LIM zeiantaz namma IŠTU UZU NINDA KAŠ [ … ]-edani piyawēn

55 -- nu=wa=za DINGIR-LUM DINGIR-LIM-nili [e]t=za eku

56 -- antuḫši=ma=wa=za kattan lē pešti

57 -- n=at EGIR-an katta ḫinkanzi

58 -- n=at=za arḫa uwanzi

59 -- kuitman=kan DINGIR-LUM aššanuškanzi

60 -- nu=za UNŪTUM tagān katta UL kuiški dāi

61 -- [U]L āra

62 -- šarā=za=at namma UL dāi

§7

63 -- [maḫḫ]an=ma=at=kan IŠTU SÍSKUR arḫa aranzi

64 -- [nu=za=kan] weteni anda MUN išḫūwanzi

65 -- nu=za=kan QĀTĪ=ŠUNU apez ārri

66 -- namma IZI 2 AŠRA warnuwanzi

67 -- n=at=kan ištarna arḫa uwanzi

68 -- ḫantezziaz=za=ma 2 MÁŠ.GAL 1 DUGḫūppar GEŠTIN 5 NINDA.GUR4.RA ḫandanzi

69 -- nu=kan 2 MÁŠ.GAL ANA DLAMMA aniyaddaš šipanti

70 -- nu=kan UZUGAB UZUZAG.UDU ZAG-an UZUNÍG.GIG UZUŠÀ zeiantaz GIŠlaḫḫurnuzzi dāi

71 -- nu aniyattaš DLAMMA 3-ŠU ekuzi

72 -- nu=za adanzi

73 -- n=at=za arḫa uwanzi

73a -- UD.2.KAM [TIL]

§8

74 -- INA UD.3.KAM mān lukkatta karūwariwar ḫūdāk

75 -- nu 1 MÁŠ.GAL 1 UDU.NÍTA 1 ŠAḪ unnianzi

76 -- EGIR-ann=a 3 NINDA.GUR4.RA 1 DUGḫuppar KAŠ ḫandānzi

77 -- n=aš LÍL-ri namma tamēdani AŠRI pennianzi

78 -- nu GIŠlaḫḫurnuzzi išparranzi

79 -- nu=ššan 3 NINDA.GUR4.RA GIŠlaḫḫurnuzzi šer tianzi

80 -- nu=kan MÁŠ.GAL UDU.NÍTA ŠAḪ apēdani ANA DINGIR-LIM šipandanzi

81 -- kuiš=kan DINGIR-LUM kī ÚŠ-an ŠÀ KARAŠ iyat

82 -- nu=wa apāš DINGIR-LUM azzikkiddu akkuškiddu=ia

83 -- nu=war=aš ANA KUR URUḪatti U ANA KARAŠ URUḪatti menaḫḫanda takšulānza ēšdu

84 -- nu=war=aš=kan andan aššuli neyāru

85 -- nu=za adanzi akuwanzi

86 -- n=at arḫa uwanzi

86a -- UD.3!.KAM TIL

§9

87 -- INA UD.4.KAM mān lukkatta karūwariwar ḫūdāk 1 GU4.MAḪ 1 UDU.'SÍG+MUNUS' 3 UDU.NÍTA ūnniyanzi

88 -- ANA UDU.'SÍG+MUNUS'=ma=ššan kuedani UDU.ŠIR nāwi pānza

89 -- 10 NINDA.GUR4.RA=ia 1 DUGḫūppar KAŠ 1 DUGḫūppar GEŠTIN

90 -- n=at LÍL-ri namma tamēdani pedi pennianzi

91 -- nu=kan GU4 ANA DIM šipanti

92 -- UDU.'SÍG+MUNUS'=ma=kan ANA DUTU šipanti

93 -- 3 UDU=ma=kan ḫūmandaš DINGIRMEŠ-aš šipandanzi

94 -- nu GIŠlaḫḫurnuzzi dagān išparranzi

95 -- nu UZUGABA UZUZAG.UDU ZAG-an UZUNÍG.GIG UZUŠÀ NINDA.GUR4.RA=ia zeiandaz EGIR-pa dāi

96 -- nu DUTU ŠAMÊ DIM DINGIRḪI.A=ia ḫūmanteš 3-ŠU ekuzi

97 -- nu=za adanzi

98 -- n=at=za arḫa uwanzi

Kol.

99 -- DUB.1.KAM

100 -- nu=ššan 3 SISKUR aniyan

101 -- 1 SISKUR INIM IZarpiya

102 -- mān MU.KAM-za ḫarranza

103 -- nu SISKUR kilāuwaš GIM-an DÙ-anzi

104 -- 1 SISKUR INIM IUḫḫamūwa

105 -- mān=kan ŠÀ KUR-TI našma URU-LIM akkiškizzi

106 -- 1 SISKUR INIM IAšḫella

107 -- mān=kan ŠA-[BI] KUR-TI našma ŠÀ-BI [KARAŠ]ḪI.A [ÚŠ]-kan kišari